Цените на нафтата денес паднаа на 68 долари на меѓународните пазари, откако Израел и Иран сигнализираа дека го прифаќаат прекинот на огнот објавен од американскиот претседател Доналд Трамп.
На лондонскиот пазар, цената на барел попладне беше за 3,37 долари пониска од вчерашното затворање на тргувањето и изнесуваше 68,11 долари. На американскиот пазар, денес со барел се тргуваше по пониска цена од 3,25 долари, односно 65,26 долари.
Пазарите вчера беа смирени од реакцијата на Иран на нападот на САД врз нуклеарните постројки во Натанц, Исфахан и Фордоу. Вчера попладне, иранската армија испука неколку ракети кон американската воена база во Катар. Никој не беше повреден, а американскиот претседател Доналд Трамп посочи дека нападот е најавен.
„Цените на нафтата нагло паднаа бидејќи нападите на САД врз нуклеарните постројки на Иран не предизвикаа проширување на конфликтот што потенцијално би ги загрозил испораките од регионот (на Блискиот Исток), напишаа аналитичарите на Барклис.
Трговците стравуваа дека Техеран би можел да го запре сообраќајот низ Ормутскиот теснец, кој пренесува помеѓу 18 и 19 милиони барели сурова нафта и гориво за купувачи од целиот свет. Главен купувач на иранска нафта е Кина.