Случаи на семејно насилство претходеле на двојното убиство во Кратово. Во текот на неколку години, имало повеќе пријави и од страна на 36-годишната В.И., која сега е осомничена дека ги убила сопругот и свекорот со остар предмет. Таа поднесувала пријави, но и против неа биле поднесени пријави. Убиството е извршено со нож.
Вчера вечер, полицајците во Кратово уапсиле 36-годишна жена која е осомничена дека со остар предмет ги убила сопругот и свекорот, извести МВР.
„На 13.06.2024 во 22.08 часот, полициски службеници од ОВР Кратово ја лишиле од слобода В.И.(36) од Кратово. Таа се сомничи дека во семејната куќа во Кратово со остар предмет ги нападнала нејзиниот сопруг Ј.И.(38) и неговиот татко С.И.(63), кои починале од здобиените повреди. По насоки на јавен обвинител телата на починатите биле предадени на обдукција“, соопштија од МВР.
Жената била приведена и задржана во полициска станица и по целосно документирање на случајот против неа ќе биде поднесена соодветна пријава.