Според германските медиуми, 18,7 милиони пензионери во Германија треба да бидат среќни – на 1 јули можат да очекуваат значително зголемување на пензиите од 3,74 проценти.
Секој што се пензионирал минатата година и добива 1.700 евра месечно од пензиски фонд, мора да плати само 70 евра данок на доход, покажуваат новите податоци на германското Министерство за финансии објавени од германските медиуми.
Помалку од осум евра данок
За споредба: ако сте се пензионирале во 2005 година и сте добиле ист износ на пензија, во моментов плаќате нешто помалку од 8 евра данок.
Причината: од 2005 година, даночниот дел од пензијата се зголемува секоја година, од тогашните 50 проценти на сегашните 83,5 проценти. Ова зголемување ќе трае до 2058 година, кога пензиите ќе се оданочуваат со 100 проценти.
Секоја година повисоки даноци
Тоа значи дека секоја година се зголемува даночното оптоварување за новите пензионери.
Ова веќе има влијание врз паричниците: новите пензионери кои примаат 2.000 евра месечно сега плаќаат 128 евра данок (6,4 отсто), во споредба со 39 евра (2,0 отсто) пред 20 години што претставува зголемување од 4,4 процентни поени.
Вагенкнехт: Оданочувањето на пензиите е грешка
Иако даночниот дел од пензијата ќе се зголемува само за 0,5 отсто годишно од 2023 година, наместо за еден отсто, едно е јасно: секој што ќе се пензионира во 2058 година и ќе добие 2.000 евра месечно, ќе треба да плати 164 евра (8,2 отсто) на даночните власти. Дополнително, има и придонеси за здравствено осигурување (во моментов: 173 евра) и осигурување за нега (68 евра).
Примерот покажува: од пензија од 2.000 евра, во најдобар случај, на пензионер му остануваат нешто помалку од 1.600 евра!
Воведувањето на оданочувањето на пензиите беше сериозна грешка, критикува шефот на БСВ, Сахра Вагенкнехт.
Нивото на пензија од 48 проценти, кое неуспешната коалиција „Семафор“ сакаше да го одржи до 2039 година, веќе е практично урната.
Даночното ослободување за малите и средните пензии би било најмалку што би требало да направи новата влада“, изјави Вагенкнехт за германските медиуми.
Во моментов, пензиите до 1.008 евра месечно (самци) и 2.016 евра (парови) се ослободени од данок, јавуваат германските медиуми.
Активно пензионирање
Но, ЦДУ/ЦСУ и СПД одат во сосема друга насока. Оние кои не можат да врзат крај со крај со пензија на старост можат да продолжат да работат ако е можно – тоа се нарекува „активно пензионирање“.
До 2.000 евра дополнителни приходи покрај пензија треба да останат ослободени од данок.