Претседателот на Република Српска Милорад Додик денеска изјави дека РС сериозно ја сфаќа изјавата на американскиот државен секретар Марк Рубио, нагласувајќи дека актуелната криза во Босна и Херцеговина не е предизвикана од РС.
Се чини, рече Додик, дека Стејт департментот „сè уште е во процесот на создавање нација“.
„Тешко е да се разбере како ова е дел од новите политики за антиглобализација и на прво место Америка за кои се залага американскиот претседател Доналд Трамп“, објави Додик на платформата „Х“, пренесува „Танјуг“.
Тој додаде дека актуелната криза во Босна и Херцеговина „не е предизвикана ниту од нас, ниту од нашиот избор“.
„Ако прифатиме дека германски бирократ и неколку амбасадори имаат моќ да го променат меѓународното право, нашиот Устав и закони, тогаш го прифаќаме крајот на Дејтонскиот договор и крајот на Република Српска. Ќе продолжиме да се бориме“, нагласи Додик.
Тој истакна дека е доследно да се разговара за мировен договор што ќе ги намали тензиите и ќе стави крај на актуелната криза, но дека тој мора да се заснова на „враќање на владеењето на правото, крај на вооружувањето на судството и заедничките државни институции на Босна и Херцеговина, како и брз крај на странското мешање во работите на РС“.
„Дозволете ми да повторам јасно, Република Српска и јас сме посветени на мирно и договорено решение на актуелната криза иницирана од Кристијан Шмит“, рече Додик.
Во саботата, Рубио рече дека САД ги охрабруваат политичките лидери во Босна и Херцеговина да се вклучат во конструктивен и одговорен дијалог.
На платформата „Х“, Рубио ги повика американските партнери во регионот да се приклучат во спротивставувањето на, како што наведе, „опасното и дестабилизирачко“ однесување на претседателот на РС, Милорад Додик, за кој рече дека ги поткопува институциите на Босна и ја загрозува нејзината безбедност и стабилност.