Претседателот на Република Српска и лидер на СНСД, Милорад Додик, денеска се закани дека ќе избрка американски службеник вработен од Бања Лука, кој, како што наведе, има информации за посети на банки и упатува закани.
Ќе биде предупреден, рече Додик, а доколку продолжи, ќе биде протеран од Бања Лука.
„Информациите што ги имаме говорат дека некој шеф на американската канцеларија посетува банки, посетува фирми, им се заканува и прави обид да ја дестабилизира ситуацијата, деновиве ќе биде предупреден да не го прави тоа. Доколку продолжи, ќе биде избркан од Бања Лука, без разлика дали станува збор за американски функционер“, изјави Додик за новинарите по седницата на Претседателството и извршниот комитет на СНСД.
Седницата се одржа по повод претстојните локални избори во Босна и Херцеговина, а Додик нагласува дека СНСД ќе остане обединета без разлика на притисоците.
Во врска со изјавата на претседателот на Србија, Александар Вучиќ, дека НАТО ги зголемува силите на Косово и Метохија и во БиХ, претседателот на Република Српска и лидер на СНСД, Милорад Додик, денеска истакна дека никој во БиХ не донел одлука дека можат да дојдат, но дека постојано се зборува за тоа.
„Единствено е, ако тие не решија да го слушаат (министерот за одбрана во Советот на министри Зукан) Хелез, но Хелез не е тој што ја носи одлуката, таа ја носи Претседателството, тие го уриваат уставниот поредок“, рече Додик на новинарите во Бања Лука.
Тој ги повика граѓаните да останат смирени доколку тоа се случи и рече дека овде никој не размислува за пушки, туку дека ќе размислуваат за јајца и домати кога ќе дојде време за такво нешто, пренесе Срна.
Бошњаците ја сакаат БиХ само за себе
Претседателот на Република Српска, Милорад Додик, денеска истакна дека БиХ, што е предвидено со Дејтон, е составена од два ентитета и во одлучувањето учествуваат три нации и дека заклучоците од собирот „Босна е наша-босанска“ се ирелевантни за Република Српска.
Додик рече дека секој има право да се бори за својот идентитет, но не на сметка на другите народи.
„Тие лажат дека БиХ е босанска. Која е нивната намера? Тие ја сакаат БиХ само за себе“, рече Додик на прес-конференција во Бања Лука.
Во оваа насока, Додик истакна дека министерот за одбрана во Советот на министри Зукан Хелез зборува за набавка на делови и хеликоптери, иако за тоа нема одлука, а нема пари во буџетот.
Тој посочи дека овие „квази босански или бошњачки интелектуалци“, како што ги нарече, сакаат само да исчезнат српскиот и хрватскиот народ во Босна и Херцеговина.