Египетскиот премиер Мустафа Мадбули ги отфрли плановите за преселување на раселените Палестинци од Појасот Газа на египетскиот Синајски Полуостров, јавува Би-би-си.
За време на посетата на Синај, тој порача дека ниту еден регионален конфликт не треба да се решава на сметка на Египет.
Претходно, денеска планот го отфрли и портпаролот на палестинскиот претседател Набил Абу Руденех, кој кажа дека Палестинската управа е против преселба на кое било место.
-Сметаме дека тоа е црвена линија што нема да дозволиме да се помине, рече Мадбули, додавајќи дека масовното преселување ќе биде еднакво на „објавување нова војна“.
За време на овој конфликт израелското Министерство за разузнавање подготви предлог за преселување на 2,3 милиони жители на Појасот Газа на египетскиот полуостров Синај, но канцеларијата на премиерот Бенјамин Нетанјаху го отфрли планот, нарекувајќи го „хипотетичка вежба“ и додаде дека тоа е само концепт на хартија.
Бидејќи сите израелски премини кон Газа се затворени, цивилите потенцијално можат да го напуштат Појасот Газа само преку граничниот премин Рафа, што е контролиран од Египет.