Климатските промени предизвикуваат сушење на огромни површини на планетата, поради што постоењето на пет милијарди луѓе ќе биде доведено во прашање до 2100 година, предупредува новиот извештај на Обединетите нации.
Три четвртини од копнената површина на Земјата стана посува во последните три децении, а овие последици не се привремени, туку трајни.
Во споредба со периодот пред 30 години, 77,6 отсто од копнената површина на планетата станала посува, а сувите области се прошириле за површина поголема од Индија и сега покриваат 40,6 отсто од површината на Земјата.
Наодите од студијата, објавени во новиот извештај на ОН, предупредуваат дека ако трендот продолжи, пет милијарди луѓе би можеле да живеат во суви области до крајот на векот. Ова ќе предизвика деградација на почвата, сушење на веќе исцрпените водни ресурси и колапс на виталните екосистеми.
„За прв пат, ја документиравме кризата со сушата со научна јасност, откривајќи егзистенцијална закана за милијарди луѓе ширум светот. На сушите им дојде крајот. Но, кога климата на една област станува посува, способноста да се врати во претходните услови се губи. Сувата клима сега влијае на огромни пространства и нема да се врати во претходната состојба, а оваа промена го редефинира животот на Земјата“, вели еден од извршните секретари на ОН, Ибрахим Тиав.
Додека климатските промени предизвикуваат пораст на температурите на целата планета, повеќе вода испарува од површината и атмосферата сè повеќе ја апсорбира.
Овој процес ја води планетата до сè потешки услови на суша и трајно ги трансформира некогаш зелените шуми во суви пасишта и ја отстранува влагата неопходна за живот и земјоделство.