Кинеските производители на електрични автомобили побрзаа да ги извезат своите возила во Европската унија пред крајниот рок на 5 јули за воведување на новите тарифи на ЕУ, надевајќи се дека ќе избегнат ретроактивно плаќање на царините. Сепак, можеби погрешно ја процениле ситуацијата, бидејќи Европската комисија наесен планира да одлучи дали тарифите ќе се применуваат ретроактивно од март.
Како дел од истрагата за тоа дали кинеските производители на автомобили добиле несоодветни субвенции, Европската комисија побара од царинските агенции во земјите-членки на ЕУ да ги следат сите електрични автомобили произведени во Кина од март, што ќе и даде на комисијата флексибилност да ги применува тарифите ретроактивно. Оваа тактика има за цел да ги обесхрабри компаниите да го преплават пазарот пред очекуваното зголемување на тарифите, пишува Politico.
И покрај тоа предупредување, производителите на автомобили го презедоа ризикот. Откако Комисијата објави повисоки тарифи од очекуваните во јуни, кинеските производители на автомобили побрзаа да натоварат што е можно повеќе возила на бродовите што пловат за ЕУ.
Регистрациите на електрични возила нагло се зголемија во јуни, со повеќе од 202.000 нови возила кои ги добија своите први регистарски таблички, во споредба со просечните 144.000 во април и мај, според Schmidt Automotive Research. Кинеските производители на електрични автомобили имаа пазарен удел од 12,4 отсто во јуни, во споредба со 10,4 отсто во истиот период минатата година.
Тарифите, во моментов во форма на банкарски гаранции, веќе се во сила, а Комисијата ќе побара од земјите на ЕУ да гласаат за нивното трајно воведување за период од пет години во октомври. Потоа ќе одлучат и дали овие тарифи ќе се применуваат ретроактивно од 7 март или од 5 јули, потврдија од Комисијата.
Иако сите возила од странско производство веќе имаат тарифи од десет проценти, новите тарифи за некои кинески производители ќе изнесуваат вкупно 48 проценти за нивните електрични возила. И покрај повисоката цена, кинеските брендови сепак можат да остварат профит на европскиот пазар благодарение на ниските трошоци за домашно производство.
Пекинг се надева дека ќе најде решение со Брисел за целосно да ги избегне царините. Досега тие преговори не одеа добро, бидејќи кинеската страна не сака да го признае ставот на ЕУ дека неправедно го субвенционира секторот низ целиот производствен синџир, од преработка на литиум до транспорт. Во исто време, кинеските извозни асоцијации тврдат дека ЕУ ја губи својата атрактивност како дестинација за инвестиции.