Европската унија треба да формира своја разузнавачка агенција, вели поранешниот претседател на Финска, Саули Ниинисто, кому Урсула Фон дер Лајен му ја довери задачата да напише детален извештај за подготвеноста на ЕУ за воени и кризни ситуации и предлози за подобрување.
Во својот нов извештај, поранешниот фински претседател Саули Ниинисто предлага Европската унија да формира своја разузнавачка агенција по моделот на американската ЦИА, која ќе им помогне на земјите-членки во борбата против растечките закани, саботажи и странски агенти, пишува „Politico“.
Предлогот доаѓа како резултат на сеопфатен преглед на одбранбената политика на ЕУ поради се повидливите активности на руските оперативци низ целиот блок.
Извештајот ја нагласува потребата од поголема соработка и размена на информации меѓу земјите-членки, со цел да се подобри националната безбедност.
Се препорачува развој на сериозна разузнавачка соработка на ниво на ЕУ, која би ги „задоволувала стратешките и оперативните потреби“. Ниинисто, исто така, истакнува дека „анти-диверзантската мрежа“ ќе биде клучна за заштита на инфраструктурата.
Во Брисел има зголемување на активностите на странските агенти, а бројни дипломати се протерани поради обвинувања за шпионажа. Руската агресија против Украина создаде дополнителни предизвици, вклучително и следење на воените локации со руски беспилотни летала и обиди за атентат врз клучните личности во воениот сектор.
Западните сојузници веќе споделуваат разузнавачки информации како дел од мрежата „Five Eyes“, која ги поврзува САД, Австралија, Канада, Нов Зеланд и Велика Британија. Според поранешниот фински претседател, сега на ред е ЕУ да го подобри протокот на информации и разузнавачки информации.
Иако Фон дер Лајен секогаш истакнува дека прибирањето на разузнавачки податоци е првенствено одговорност на секоја од земјите-членки, таа исто така смета дека е потребна подобра размена на тие информации.
Ниинисто предлага и усвојување на „закон за подготвеност“, кој би ги дефинирал принципите, стандардите и целите на соработката меѓу земјите-членки.