Речиси целосен фосил на череп, пронајден на Антарктикот, откри дека најстарата позната модерна птица е суштество со големина на патка, сродно на денешните водни птици што живеат покрај езера и океани, покажува нова студија, а пренесува Си-ен-ен.
Фосилот, стар 68 милиони години, ѝ припаѓа на изумрената птица Вегавис, која живеела на крајот од кредниот период, во времето кога Тираносаурусот доминирал во Северна Америка и непосредно пред џиновски астероид да ја удри Земјата, осудувајќи ги диносаурусите на истребување.
Птиците што живееле заедно со диносаурусите биле тешко препознатливи во споредба со денешните видови. Многу од нив имале бизарни карактеристики, како клунови со заби и долги, коскасти опашки.
– Вегавис, сепак, била слична по големина на патка и еколошки налик на водни птици, изјави Кристофер Торес, доцент по биологија на Универзитетот на Пацификот во Калифорнија и водечки автор на студијата, објавена во списанието „Нејчр“.
„Оваа птица била нуркач што се придвижувал со нозете. Ја користела својата мускулатура на вилицата за брзо затворање на клунот под вода при лов на риби. Тоа е начин на живот што денес го гледаме кај гушкарите и нуркачите“, објасни тој.