Францускиот претседател Емануел Макрон официјално не објави дека ќе се кандидира на претседателските избори во април, но тој прави долгорочни планови за земјата, а неговиот предизборен тим активно се среќава со гласачите.
Затоа е критикуван дека неправедно ја искористил претседателската функција за кампањата за вториот мандат, а притоа го одложува објавувањето на кандидатурата, иако до првиот изборен круг на 10 април остануваат неполни два месеци.
Макрон минатиот месец рече дека сака да се кандидира, но дека ќе чека да се подобри ситуацијата со пандемијата пред да донесе одлука. Рокот за формално изјаснување на кандидатурата е 4 март.
Тој рече и дека сака прво да се фокусира на украинско-руската криза, поради која минатата недела ги посети Москва и Киев.
Сепак, критичарите велат дека неговите неодамнешни патувања во француските области се повеќе наликуваат на претседателска кампања, бидејќи при посетата на северот најави инвестиција од 100 милиони евра за зајакнување на економијата во таа област.
Претседателскиот кандидат Ерик Земур од екстремната десница го обвини Макрон дека го користи аргументот за пандемијата за да ги натера француските гласачи да заборават што тој го смета за пад на Франција.
Лидерот на Републиканската партија Кристијан Џејкоб ја осуди „злоупотребата на јавните пари“ и рече дека го пријавил проблемот до Националната изборна комисија.
Франција има строги правила за финансирање на претседателската кампања. Поранешниот претседател Никола Саркози минатата година беше осуден на една година затвор за незаконско финансирање на кампањата.
Партијата на Макрон веќе започна таканаречена „кампања за претседателско мнозинство“ која ја промовира низ целата земја преку постери и летоци кои укажуваат на веб-страницата наречена „Со тебе“.
На страницата не се споменува името на Макрон, но граѓаните се поканети да се претплатат на билтенот за да можат да ги следат вестите за кампањата.
Уставниот совет неодамна објави дека Макрон бил првиот што собрал 500 потписи од функционери кои според францускиот закон се обврзани да учествуваат на претседателските избори.