Германија беше домаќин на полицајци од цела Европа кои пристигнаа да помогнат во одбраната од потенцијалните закани на овогодинешното Европско првенство во фудбал, а министерката за внатрешни работи Ненси Фезер вети внимателност пред првиот натпревар подоцна оваа недела.
– Нашиот фокус е првенствено заканата од исламистичкиот тероризам, хулиганите и нивните прекршоци, секојдневните злосторства, насилните криминалци, но овојпат и од сајбер нападите, рече Фезер на церемонијата на околу 350 полицајци распоредени за обезбедување на шампионатот.
Групите како Исламската држава веќе повикаа на напади на едномесечното европско фудбалско натпреварување, кое започнува во петок со натпревар помеѓу домаќинот Германија против Шкотска.
– Нашите безбедносни власти затоа цврсто ја имаат исламистичката сцена на нишан, рече Фезер.
Германија очекува 2,7 милиони луѓе да ги следат натпреварите на стадионите, а околу 12 милиони ќе ги следат во фан зоните, односно на отворено, како што е просторот пред берлинската Бранденбуршка порта.
Навивачките зони беа популарни за време на Светското првенство во Германија во 2006 година, но останува да се види какво ќе биде расположението на овој спортски настан со оглед на тензиите околу конфликтот во Украина и на Блискиот Исток и зголемената поддршка за екстремната десница во Европа.
– Некои луѓе се обидуваат да ги донесат овие конфликти во нашата земја, предупреди министерката, додавајќи дека нема да се толерира пропаганда и говор на омраза на германските улици.
Германските безбедносни власти, исто така, соработуваат со меѓународните партнери за да ги идентификуваат потенцијалните закани, а земјата ги зајакна граничните контроли.