Германската економија не успева да излезе од кризата. Владата ја намали прогнозата за економски раст. Во тековната година се очекува бруто-домашниот производ да стагнира, објави во четврток министерот за економија Роберт Хабек, пренесува ДПА.
Според пролетната прогноза, економијата нема да забележи раст трета година по ред.
Во јануари, Владата сè уште очекуваше пораст од 0,3 проценти, но сега се предвидува нула. Министерството за економија оценува дека економијата се наоѓа во „бурни води“.
Глобалната неизвесност значително се зголеми поради царините што ги објави и делумно ги повлече американскиот претседател Доналд Трамп, соопшти министерството.
Ова особено влијае врз извозно ориентираната германска економија – побарувачката од странство е слаба и онака.
Владата не очекува значително закрепнување ниту следната година. Се прогнозира раст од само еден процент.
„Се очекуваат позитивни импулси од фискалните одлуки на идната влада, кои, сепак, ќе придонесат за раст дури во наредните години.“
Очекуваната нова влада на Христијанските демократи (CDU/CSU) и Социјалдемократите (SPD) најави обемни мерки за стимулирање на економијата во коалицискиот договор.
Еден од примерите е „инвестицискиот стимул“ за компаниите.
Коалицијата, исто така, има за цел да ги намали трошоците за енергија, да ги олесни законите за труд, како и да ја намали бирократијата и даноците за бизнисите.
Планирано е и проширување на обновливите извори на енергија со цел намалување на трошоците.
Целта, според договорот, е повторно да се зголеми таканаречениот потенцијален раст на повеќе од еден процент.
Во ова треба да придонесат големи инвестиции, особено во инфраструктурата – што вклучува реконструкција на мостови, патишта, железници и училишта.
Но, само парите не го решаваат проблемот, рече Хабек. Структурните проблеми мора да се решаваат брзо и доследно, додаде тој. „Ќе зависи од тоа дали германската економија ќе добие поттик за својата конкурентност или парите ќе бидат потрошени залудно, без ефект.“
Деловните здруженија постојано го наведуваат недостигот на работна сила, доцнењата во планирањето и издавањето дозволи, како и високите меѓународни цени на енергијата, како главни пречки.
Според пролетната проекција, инфлацијата ќе падне од минатогодишните 2,2 проценти на 2 проценти оваа година, а следната година на 1,9 проценти.
Хабек е министер за економија и заштита на климата и вицеканцелар од крајот на 2021 година. Неговиот мандат беше обележан со последиците од рускиот напад врз Украина, вклучително и енергетската криза.
Благодарение на обемните мерки, Владата успеа да спречи подлабока рецесија. Мандатот на Зелените, исто така, значително го забрза проширувањето на обновливите извори на енергија од ветер и сонце.
Хабек се соочи и со критики, на пример поради контроверзниот закон за греење со неговите многубројни детални регулативи, кои новата влада сака да ги укине.