Либанската милитантна група Хезболах во понеделник предупреди на можноста за ескалација по најсмртоносниот напад на Израел од прекинот на огнот во ноември, во кој загинаа 12 лица.
Хезболах изјави дека нападот претставува „голема ескалација во контекст на тековната агресија против Либан и неговиот народ“ и ја повика владата во Бејрут да „преземе сериозни, итни и решителни мерки“ за одржување на прекинот на огнот со Израел. Милитантите, исто така, побараа САД да ја исполнат својата одговорност како спонзор на прекинот на огнот, објави Ал Џезира.
„Во отсуство на официјален, силен и ефикасен став и континуирана небрежност и неактивност на меѓународно ниво, ова само ќе доведе до поголеми прекршувања и агресија.
Израел се обидува да изврши притисок врз националната волја на Либан, но либанскиот народ ќе се држи до отпорот како избор за соочување со непријателот“, соопшти Хезболах.
Седум Сиријци и пет Либанци беа убиени, а 12 други беа повредени во израелскиот напад врз либанските провинции Бека и Баалбек-Хермел.
Катарската телевизија вели дека Израел речиси секојдневно го крши прекинот на огнот со нови напади врз Либан, пренесува Танјуг.