Израелскиот претседател Исак Херцог побара прошка од четворицата убиени израелски заложници затоа што не ги заштитиле или не ги вратиле живи во Израел, објави „Тајмс оф Израел“.
„Агонија“. Болка. Мак. „Нашите срца, срцата на целата нација, страдаат“, напиша Херцог на платформата X, објави Тајмс оф Израел. Веднаш откако Израел објави изјава дека четирите ковчези се предадени преку Црвениот крст, тој напиша дека во име на државата Израел ја наведнал главата и молел за прошка.
Палестинската милитантна група Хамас претходно денеска соопшти дека се обидела да ги задржи во живот израелските затвореници што ги држела во притвор, но дека тие биле убиени од израелската војска на инсистирање на израелскиот премиер Бенјамин Нетанјаху да ја продолжи војната во Газа.
По предавањето на телата на четворицата израелски заложници, Хамас во соопштението изјави дека „ги зачувал животите на окупационите затвореници“, дека им обезбедил се што може и „се однесувал хумано кон нив, но дека биле убиени од нивната војска заедно со киднаперите“, објави Ал Џезира. „Криминалецот Нетанјаху денес плаче над телата на затворениците кои му беа вратени во ковчези, во очигледен обид да ја избегне одговорноста за нивното убиство пред својата јавност“, додаде Хамас.
Обраќајќи им се на семејствата на убиените израелски затвореници, семејствата Бибас и Лифшиц, Хамас изјави дека би сакал нивните синови да се вратат живи, но дека израелската армија и израелските лидери одлучиле да ги убијат наместо да ги вратат. Телата на четворицата убиени израелски заложници се предадени на израелските одбранбени сили во Појасот Газа, објави Тајмс оф Израел, откако палестинската милитантна група Хамас ги предаде на Црвениот крст.
Кабинетот на израелскиот премиер Бенјамин Нетанјаху претходно денеска објави дека телата на мајката и нејзините две деца – Шири, Ариел и Кфир Бибас, како и Одед Лифшиц – ќе и бидат предадени на израелската војска.
Портпаролот на Хамас изјави дека четворица заложници биле убиени во израелски воздушни напади, пренесува Танјуг.