Израел се подготвува за брз напад на иранските нуклеарни постројки доколку преговорите меѓу Соединетите Американски Држави и Иран пропаднат, објави американскиот портал Аксиос, повикувајќи се на два израелски извори запознаени со дискусиите.
Израелската разузнавачка заедница ја смени својата позиција во последните неколку дена од верување дека нуклеарниот договор е блиску до постигнување до размислување дека разговорите наскоро би можеле да пропаднат, велат изворите.
Еден извор рече дека израелската војска верува дека нејзиниот оперативен прозорец за успешен напад може да се затвори наскоро, па Израел ќе мора брзо да дејствува доколку преговорите не успеат. Изворот не сакаше да открие зошто војската верува дека нападот подоцна ќе биде помалку ефикасен.
„Имаше многу обука и американската војска гледа сè и разбира дека Израел се подготвува“, изјави еден извор за Аксиос.
Двата извора го потврдија извештајот на Си-Ен-Ен дека израелските одбранбени сили (ИДФ) спроведуваат вежби и други подготовки за можен напад врз Иран.
„Биби чека да пропаднат преговорите за нуклеарниот договор и да дојде моментот кога Трамп ќе биде разочаран од преговорите и подготвен да му даде зелено светло“, додаде еден израелски извор, користејќи го прекарот за премиерот Бенјамин Нетанјаху.
Американски официјален претставник изјави за Аксиос дека администрацијата на Доналд Трамп е загрижена поради можноста Нетанјаху да дејствува дури и без одобрение на претседателот Трамп.
Претходно оваа недела, Нетанјаху одржа многу чувствителен состанок со група врвни министри, безбедносни и разузнавачки претставници во врска со статусот на нуклеарните преговори, изјави израелски претставник.
Петтата рунда нуклеарни преговори меѓу САД и Иран е закажана за петок во Рим.
Специјалниот пратеник на Белата куќа, Стив Виткоф, му даде на својот ирански колега писмен нацрт на договорот за време на последната рунда пред десет дена. Во тој момент се чинеше дека растеше довербата дека може да се постигне договор.
Сепак, преговорите дојдоа до пречка за тоа дали Иран ќе може да задржи некој домашен капацитет за збогатување ураниум.
„Имаме една многу јасна црвена линија, а тоа е збогатување. Не можеме да дозволиме ни 1% од капацитетот за збогатување“, рече Виткоф на емисијата „Оваа недела“ на ABC во неделата. Иранските лидери постојано нагласија дека нема да потпишат договор што не им дозволува да збогатуцаат ураниум.
Два израелски извори наведуваат дека израелскиот напад врз Иран нема да биде еднократен, туку воена кампања која ќе трае најмалку една недела.
Таквата операција би била исклучително сложена и опасна, како за Израел, така и за целиот регион. Земјите во регионот стравуваат дека израелски напад може да предизвика раширена радиоактивна контаминација, а да не ја спомнуваме можноста за војна.
На својата прва прес-конференција по шест месеци во понеделникот, Нетанјаху рече дека Израел и САД се целосно усогласени со Иран.
„Ние ги почитуваме нивните интереси, тие ги почитуваат нашите интереси и овие интереси речиси целосно се преклопуваат“.
Нетанјаху рече дека ќе го почитува секој договор што го спречува Иран да збогатува ураниум и да го спречи да добие нуклеарно оружје. „Но, во секој случај, Израел го задржува правото да се брани од режим кој се заканува со негово уништување“, изјави тој.