Словенечкиот премиер Јанез Јанша рече дека вистинските разговори меѓу Киев и Москва ќе се одржат едвај кога ќе се постигне прекин на огнот, што во моментов се чини на „светлосни години“ со оглед на ставовите на двете страни, но рече дека рускиот претседател Владимир Путин оваа војна веќе „не може да ја добие“.
„Ова не беа вистински преговори, туку „тестирање на теренот“. Сериозни преговори ќе има кога ќе се постигне прекин на огнот, кога оружјето барем привремено ќе замолчи“, изјави Јанша за Словенечката телевизија, коментирајќи ги првите разговори меѓу двете страни на украинско-белоруската граница.
Тој додаде дека поради отпорот на Украина, но и реакцијата на меѓународната заедница, шансите за тоа растат секој ден, а Путин „веќе не може да ја добие оваа војна“.
Планирајќи го нападот на Украина, според Јанша, Путин направил две „стратешки грешки“ – првата затоа што лошо пресметал дека „Украина ќе падне за неколку дена“ и втората затоа што не сметал на одлучниот став на ЕУ и НАТО, сметајќи дека е можно санкциите за интервенција на руската армија да не бидат посилни од оние што му беа наметнати по интервенцијата во Грузија и анексијата на Крим.
„Овој пат беше поинаку и Путин повеќе не може да ја добие оваа војна“, изјави словенечкиот премиер.
Според него, Русија на Путин не била подготвена за таква војна, па секој ден што Украина „го издржува“ ја зголемува можноста за прекин на огнот и некои сериозни преговори.
„Русија не може да ги издржи овие санкции без целосно да ги промени во стратешка смисла, а санкциите најмногу го засегаат потесното опкружување на Путин, односно олигарсите кои се потпора на Путин. Полека се оттргнуваат од Путин, а кога тоа ќе има ефект ќе се види“, изјави Јанша.