Возовите, автобусите, трамваите и метрото во Холандија запреа три минути во знак на протест против зголеменото насилство врз вработените во јавниот превоз.
Речиси целиот јавен превоз во земјава запре во саботата во 22:30 часот, а сите продавници на железничките станици ги затворија вратите. Во Амстердам застанаа и траектите, пренесува Хина.
Портпаролот на холандските железници изјави дека протестот бил успешен и дека сите возови запреле.
За причината за протестот биле информирани патниците. „Оставете ги нашите колеги на мира, благодарам“, рекоа кондуктерите на возовите преку информациските системи за патници и на железничките станици.
Протестот е реакција на малтретирање на кондукторка пред седум дена, кога беше претепана од група млади момчиња и турната по скалите. Поради тоа 15-годишник заврши во притвор, а претепан бил и машинскиот.
На протестот се приклучија и јавните транспортни претпријатија и нивните синдикати на регионално и општинско ниво.
Јавните превозници веќе подолго време се жалат на насилство и агресија врз работниците. Само на железницата лани се случиле 1.042 насилни инциденти, осум отсто повеќе од претходната година.