Нови 24 улици, специјално возило за противпожарната единица, реновирани четири детски игралишта, за енергетска ефикасност променета е дограмата во прилепските училишта, урбанистички планови за градот и населените места, изградба на спортскиот стадион „Гоце Делчев“, проекти во тек и можеби најважното, набавката на четири нови автобуси на метан за посигурен превоз и заштита на животната средина. Ова се дел од проектите оваа година и бројните зафати во тек и продолжуваат во наредната 2020 година, на прилепската локална самоуправа, кажа во отчетот прилепскиот градоначалник Илија Јованоски.
Според Јованоски, годинава била активна за подобрување на животот на граѓаните во повеќето сфери.
– Оваа година се изградени 24 улици во должина од околу 12 километри, а имаме тампонирано околу 20 километри улици во градот и во населените места. Денеска е отворањето на новиот тендер и аукцијата за асфалтирање улици во вредност од 15 милиони денари и се надевам дека до крајот на оваа градежна сезона ќе може дополнително да асфалтираме околу десетина улици. Особено е важна набавката на четири автобуси на метан како нови еколошки автобуси, со кои обезбедуваме посигурен и побезбеден превоз и ја заштитуваме животната средина. Прилепската противпожарна единица доби специјално возило во вредност од околу 6 милиони денари, како и придружна опрема за пожарникарите кои, пожртвувано во изминатите 10 месеци се справија со над 500 пожари во Општината, од кои над 300 биле ридско–планински, како и со триесетина сообраќајни несреќи. Реновирани се четири детски игралишта, а направено е и едно ново во Паркот на Револуцијата кое, поради изборот на Прилеп за најеколошка општина во државава, е донација од компанијата „Пакомак“. Поставена е нова урбана опрема во централното градско подрачје во вредност од околу 2.400.000 денари, рече Јованоски.
Завршен е проектот “Маркови Кули – заштита и делување“, при што е изградена инфраструктура и пристапен пат, особено ако се знае дека комплексот „Маркови Кули“ претендира да биде на постојаната листа на УНЕСКО. Според Јованоски, е битна изградботката на урбанистичките планови и на градскиот стадион „Гоце Делчев“.
-Комплетно се изработени четири урбанистички планови во градот, а во постапка се уште шест детални и три регулациски урбанистички планови кои ќе бидат завршени до крајот на оваа година. На Градскиот стадион „Гоце Делчев“ веќе се реконструираат трибините. Што се однесува до енергетската ефикасност, целосно е променета дограмата во Домот за стари лица, зафат вреден 15 милиони денари, а променета е дограмата во четири основни и две средни училишта со средства од 8 милиона денари. направени се фасади во подрачни улилишта и со 3,7 милиони денари се реконструира зградата на приелепската гимназија „Мирче Ацев“, рече Јованоски.
Зафати за реконструкции и обновување на објектите има и во детските градинки, а Јованоски нагласува дека е направен идејниот проект за секундарната дистрибутивна гасоводна мрежа.
-Секундарната дистрибутивна гасоводна мрежа е во должина од 20 километри, а во тек е изработката на Основниот проект, но сѐ уште се чека на одлуката од Владата за тоа дали државата комплетно ќе ја гради и секундарната мрежа, или секоја општина посебно, рече Јованоски.
За проектите кои се во тек, неколку издвои како посебно значајни за Прилеп.
-Првпат по 45 години се гради армирано-бетонскиот мост на Градската Река во населбата Сточен пазар и е од големо значење за шпедицијата и целиот транспорт на стопанските субјекти. Ќе се гради Прилепскиот булевар за што е завршен тендерот за изведувач. Во тек се три проекти преку Агенцијата за рурален развој, за кои тендерската постапка завршува во ноември, а се однесуваат на изработката на техничка документација за урбанизирање на 30 села, за изградба на патот помеѓу селата Волково и Прилепец, па и патот до манастирот „Св.Никола. Во завршна фаза е подготовката на проектите за поставување на пристапни рампи во училиштата и детските градинки, рече Јованоски објаснувајќи што се е направено годинава или е во тек за подобрување на животот на прилепчани.