Политичар во Јужна Кореја е критикуван за опасното и неосновано мислење дека по „доминантната“ улога на жената во општеството е причина за зголемување на бројот на самоубиства кај мажите.
Во извештајот, градскиот советник во Сеул, Ким Ки-дук, тврди дека зголемениот број вработени жени им отежнува на мажите да најдат работа и да стапат во брак.
Тој исто така тврди дека Јужна Кореја станала „општество во кое доминираат жени“ и дека тоа би можело да биде одговорот на зголемувањето на обидите за самоубиство кај мажите.
Оваа земја е меѓу првите по стапка на самоубиства во категоријата богати земји, но и меѓу последните по родова еднаквост.
Коментарите на советникот Ким беа критикувани како последни во серијата непримерни забелешки од машки политичари.
Советникот Ким од Демократската партија дошол до овој заклучок анализирајќи ги податоците за обидите за самоубиство на мостовите долж реката Хан во Сеул.
Извештајот, кој е објавен на официјалната веб-страница на градското собрание, покажува дека бројот на обиди за самоубиство покрај реката се зголемил од 430 во 2018 година на 1.035 во 2023 година.
Процентот на мажи кои се обиделе да се самоубијат се зголемил од 67 на 77 проценти.
Експертите за превенција од самоубиства изразија загриженост за извештајот на градскиот советник.
„Опасно е и неразумно да се изнесуваат такви тврдења без доволно докази“, изјави за Би-Би-Си Сонг Ин Хан, професор по ментално здравје на Универзитетот Јонсеи во Сеул.
Тој посочи дека и на светско ниво бројот на самоубиства е поголем кај мажите отколку кај жените.
Во многу земји, како што е Велика Британија, самоубиството е водечка причина за смрт кај мажите помлади од 50 години.
Професорот Сонг вели дека причините за ненадејниот пораст на машките самоубиства во Сеул треба научно да се проучат, опишувајќи го контекстот на изјавата на политичарот како „многу тажен“.
Во Јужна Кореја, постои значителен јаз меѓу мажите и жените во редовен работен однос, со многу повеќе жени на привремени позиции и скратено работно време.
Јазот во платите полека се намалува, но жените се уште се платени во просек 29 отсто помалку од мажите.
Во последниве години, се разви и антифеминистичко движење, предводено од разочарани млади мажи кои сметаат дека нивната позиција е неповолна.
Се чини дека ваквите ставови ги поддржува советникот Ким, кој во извештајот заклучи дека единствениот начин да се надмине доминацијата на жените е да се подобри свеста на луѓето за родовата еднаквост, така што и мажите и жените ќе уживаат еднакви можности.
Многу Корејци ги осудија коментарите на политичарот на социјалната мрежа Х, нарекувајќи ги „мизогински“ и „непоткрепени“, при што еден корисник се прашуваше дали „живее во паралелен универзум“.
Партијата на правдата на Јужна Кореја го обвини советникот дека „лесно им ја префрла вината на жените кои се борат да ја избегнат родовата дискриминација во корејското општество“.
Го повикаа да го повлече извештајот и соодветно да ги анализира податоците.
Запрашан да го коментира извештајот, Ким за Би-Би-Си изјави дека „немал намера да го критикува општеството во кое доминираат жени, туку само го кажал својот сопствен став“.
Сепак, неговите коментари се само еден од серијата ненаучни и бизарни предлози за политика насочени кон решавање на некои од најитните социјални прашања во Јужна Кореја, како што се менталното здравје, родовото насилство и најниската стапка на наталитет во светот.
Минатиот месец, друг градски советник во Сеул објави серија написи на веб-страница во кои ги повикува младите жени да се занимаваат со гимнастика и вежби на карлицата за да го зголемат наталитетот.
Експертите препорачаа девојчињата да почнат на училиште порано од момчињата за подоцна да бидат повеќе привлечени едни кон други и со тоа да бидат поподготвени за брак.
„Ваквите коментари покажуваат колку е распространета мизогинијата во Јужна Кореја“, рече Јури Ким, директорка на Корејската унија на жени.
Таа ги обвини политичарите дека не се ни обидуваат да ги разберат предизвиците со кои се соочуваат жените.
„Критикувањето на жените дека се вработени само го продлабочува јазот што постои во нашето општество“, изјави таа за Би-Би-Си.
Жените во моментов сочинуваат 20 отсто од парламентот на Јужна Кореја и 29 отсто од локалните собранија.
Градскиот совет на Сеул изјави за Би-Би-Си дека нема начин да се провери што објавиле политичарите на официјалната веб-страница, се додека содржината не е нелегална.
Наведоа и дека само поединци одговараат за тоа што ќе го објават, како и дека ќе се соочат со последиците на следните избори.