Светското производство на рибарство и аквакултура достигна нов рекорд – во 2022 година се искачи на 223,4 милиони тони, што е за 4,4 отсто повеќе отколку во 2020 година. Произведени се 185,4 милиони тони водни животни и 37,8 милиони тони алги, се наведува во најновиот извештај на Организацијата за храна и земјоделство на Обединетите нации (ФАО).
Во извештајот на ФАО се наведува дека аквакултурата (одгледување на водни организми во свежи и морски води со човечка интервенција) достигнала невидени 130,9 милиони тони храна, со што за прв пат во историјата го надминала риболовот.
Во моментов, мал број земји доминираат во аквакултурата, само десет од нив произведуваат повеќе од 89,8 проценти од водната храна (Кина, Индија, Индонезија, Виетнам, Бангладеш, Филипини, Република Кореја, Норвешка, Египет и Чиле). Сепак, многу земји во Африка и Азија не го користат својот целосен потенцијал.
Се проценува дека вкупната продажна вредност на производството на рибарство и аквакултура е 472 милијарди долари. Според податоците на ФАО, најголеми извозници на водни животински производи се Кина, Норвешка, Виетнам, Еквадор и Чиле, додека најголеми увозници се САД, Кина, Јапонија, Шпанија и Франција.
Како што нагласува ФАО, насочените политики, трансферот на технологија, градењето капацитети и одговорните инвестиции се клучни за поттикнување на одржлива аквакултура, каде што е најпотребна, особено во Африка.
Ова зголемување на производството, како што додаваат од ФАО, укажува на способноста на аквакултурата да игра клучна улога во безбедното снабдување со храна за растечката светска популација.
„ФАО ги поздравува значајните достигнувања досега, но потребни се понатамошни трансформативни и адаптивни активности за зајакнување на ефикасноста, инклузивноста, еластичноста и одржливоста на системите за водена храна и консолидирање на нивната улога во справувањето со несигурноста на храната, намалувањето на сиромаштијата и одржливото управување“, рече директорот на ФАО, Ку Донгју.
Глобалната потрошувачка на водна храна во 1961 година била 9,1 кг по глава на жител, така што во 2022 година количината би се удвоила – 20,7 кг по човек.
„Храната од водните екосистеми и аквакултурата обезбедува висококвалитетни протеини – 15 проценти од животинските протеини и шест проценти од вкупниот протеин во светот, како и клучни хранливи материи како што се омега-3 масни киселини, минерали и витамини“, се додава во извештајот на Организацијата за храна и земјоделство на ОН.
Производството на водни животни се очекува да се зголеми за 10 отсто до 2032 година и да достигне 205 милиони тони.
Проекциите за 2050 година укажуваат дека производството ќе треба да се зголеми за 22 отсто за да може потрошувачката на храна по жител да биде иста како во 2022 година.