За стотици милиони луѓе што живеат во Индија и Пакистан, раното доаѓање на летните топлотни бранови стана застрашувачка реалност што ги тестира границите на издржливоста и врши огромен притисок врз енергетските извори, клучните земјоделски култури и средствата за егзистенција. Двете земји обично доживуваат топлотни бранови во текот на летните месеци мај и јуни, но годинашната сезона на топлотни бранови пристигна порано од вообичаеното и се предвидува дека ќе трае подолго.
Се очекува оваа недела температурите во двете земји да достигнат опасно високи нивоа, јавува CNN. Пакистанската метеоролошка служба соопшти дека во одредени делови од Пакистан температурите ќе бидат до 8 Целзиусови степени над просекот, во периодот од 14 до 18 април. Ситуацијата е слична на живеењето во Долината на смртта во САД, најтоплото и најсувото место во Северна Америка, каде што температурите често достигнуваат слични нивоа во текот на денот.
Ајуб Коса, жител на градот Дера Мурад Џамали во Балучистан, изјави дека топлотниот бран пристигнал со интензитет што ги фати многумина неподготвени, создавајќи сериозни проблеми за населението.
„Еден од главните проблеми се постојаните прекини на електричната енергија“, изјави Коса за CNN, додавајќи дека тие може да траат и до 16 часа дневно.
„Затоа влијанието на топлината е уште поизразено и на луѓето им е потешко да се справат со неа“, додаде тој.
Соседна Индија, исто така, доживува екстремна топлина која пристигна порано од вообичаено, а нејзиниот метеоролошки оддел ги предупредува деловите од земјата да се подготват за натпросечен број денови со топлотен бран во април.
Максималните температури во главниот град Делхи, град со повеќе од 16 милиони жители, веќе трипати овој месец ја надминаа границата од 40 степени Целзиусови – и тоа до 5 степени над сезонскиот просек, според метеоролошкиот оддел. Жештините се забележани и во неколку соседни држави, вклучително и во Раџастан на северозапад, каде работниците и земјоделците се борат да се справат со условите, а веќе почнуваат да се појавуваат и извештаи за болести.
Некои делови на Раџастан во понеделникот забележаа максимални температури до 44 степени Целзиусови, соопшти метеоролошкиот оддел. Анита Сони од женската група Тар Махила Санстан изјави дека овогодинешните жештини се многу полоши од претходните години и дека е загрижена за тоа како тоа ќе влијае на децата и жените во државата.
„Кога работниците или земјоделците излегуваат надвор, веднаш се соочуваат со недостиг од вода за пиење. Луѓето често чувствуваат мачнина, болест или вртоглавица“, рече таа.
Фармерот Балу Лал изјави дека луѓето веќе се разболуваат работејќи на таа жештина. „Не можеме ниту да издржиме, а камоли да работиме на овие температури“, рече тој. „Кога излегувам надвор, се чувствувам како луѓето да изгорат од топлината.“
Лал изрази загриженост за својата работа и за тоа како ќе обезбеди приходи за своето семејство. „Немаме каде да одиме“, рече тој.
Тестирање на границите на преживување
Експертите велат дека зголемените температури ја тестираат човечката издржливост. Екстремните жештини убија десетици илјади луѓе во Индија и Пакистан во последните децении, а експертите за клима предупредуваат дека до 2050 година, Индија ќе биде меѓу најзагрозените земји во светот каде температурите ќе ги надминат границите на преживување.
За време на топлотните бранови, бремените жени и нивните неродени деца се особено изложени на ризик. „Имаме необјаснети загуби на бременост и предвремени породувања“, рече Неха Манкани, советник во Меѓународната конфедерација на акушерки во Карачи.
„Во текот на летото, 80% од бебињата се раѓаат предвреме со респираторни проблеми поради временските услови. Исто така, гледаме зголемување на гестациската хипертензија, што може да доведе до прееклампсија, водечка причина за смртност кај мајките.“
Индија и Пакистан, две земји со изразени развојни нееднаквости, се очекува да бидат меѓу најранливите на климатската криза, при што ќе бидат погодени повеќе од една милијарда луѓе на потконтинентот.
Последиците ќе бидат поразителни. Според Мехруниса Малик, експертка за климатски промени и одржливост од пакистанската престолнина Исламабад, очекуваните ефекти вклучуваат недостиг на храна, суши и поројни поплави поради топењето на глечерите.
Заедниците кои немаат пристап до климатизација, соодветно домување и чии средства за живот зависат од природата, ќе бидат многу посилно погодени, рече Малик.
„За земјоделците времето стана непредвидливо“, рече таа. „Главниот проблем е што температурите растат во време кога посевите сè уште не се подготвени за берба. Тие почнуваат да созреваат порано, приносите се помали, а во овие сушни услови им треба повеќе вода… Ако растенијата сè уште се млади, интензивната топлина им остава речиси никакви шанси за преживување.“
Тофик Паша, земјоделец и еколошки активист од Карачи, изјави дека летото сега започнува многу порано. Неговата родна провинција Синд, која заедно со Белуџистан забележа некои од највисоките температури во светот во последниве години, претрпе сериозна суша во текот на зимските месеци, а малите количества дожд доведоа до недостиг на вода, рече тој.
„Ова ќе биде огромен удар за егзистенцијата на земјоделците“, рече Паша, објаснувајќи како температурите влијаат и на појавата на штетници.
„Цветовите не можат да се оплодат, паѓаат, плодовите не растат, имате наезда од штетници кои ги уништуваат посевите. Понекогаш станува премногу жешко. Циклусите се нарушени. Производството на храна е сериозно погодено.“
Топлотните бранови претходно ја зголемија побарувачката за електрична енергија, што доведе до недостиг на јаглен и остави милиони луѓе без струја. Возовите беа откажани за да се заштеди енергија, а училиштата беа затворени, што влијаеше на образованието.