Рускиот министер за надворешни работи Сергеј Лавров ја објасни реториката на американскиот претседател Доналд Трамп за Украина со незадоволство и фактот дека група европски претставници ги саботираат неговите напори за решавање на ситуацијата во Украина.
„Кога ќе види дека група европски претставници почнуваат да ги саботираат неговите напори (за воспоставување мир), туркајќи ја Украина на неодговорни дејствија, вклучително и напади со беспилотни летала врз Москва, другите наши градови и напади врз хеликоптерот на рускиот претседател, секако дека може да покаже одредени емоции. И, секако, како личност која не сака пречки на патот кон постигнување благородни цели, има одредени проценки, одредена реторика“, рече Лавров на прес-конференција по разговорите со турскиот министер за надворешни работи Хакан Фидан, пренесува РИА Новости.
Лавров додаде дека главната работа не е да се обрне внимание на реториката, туку да се осигура дека Европа ќе престане да го саботира движењето кон мир, кое го поддржуваат и САД и Турција, а на кое Русија е целосно посветена.
Тој изјави дека постои причина да се верува дека Германија одамна и тајно донела одлука да ѝ дозволи на Украина да изврши напади со долг дострел на руска територија.
Германскиот канцелар Фридрих Мерц вчера во интервју за WDR изјави дека Велика Британија, Франција, САД, а сега и Германија, ги укинале ограничувањата за дометот на воени испораки за Украина и дека Киев може да напаѓа цели на руска територија со оружје со долг домет, но денес рече дека одлуката за укинување на ограничувањата за дометот на оружјето што му се испорачува на Киев е донесена пред неколку месеци.
„Господинот Мерц, очигледно сфаќајќи што кажа, изјави дека не мислел на нова одлука, туку на одлука донесена од претходната администрација во Берлин, што уште еднаш нè наведува да помислиме дека одлуката да ѝ се дозволи на Украина она што всушност го сака, па, барем во одредени граници, но во врска со нападите врз цели на руска територија, е донесена одамна, се чувала во тајност“, рече Лавров, пренесува Танјуг.
Тој рече дека европските земји ги игнорираат намерните напади врз руската цивилна инфраструктура од Украина.
Рускиот министер за надворешни работи посочи дека западните лидери или не се информирани за тоа што се случува во Украина или едноставно не сакаат да ја знаат вистината.
Според него, европските „јастреби“ сфаќаат дека немаат доволно сила да ја продолжат војната и се плашат дека САД ќе се откажат од нив.
„Тие самите, европските јастреби, предводени од Франција, Велика Британија, Германија и блиската Полска, не се доволно силни за да ја продолжат оваа војна и многу се плашат… дека САД ќе се откажат од неа и ќе речат: „Вие го започнавте овој хаос заедно со (поранешниот американски претседател Џозеф) Бајден, затоа само напред и надминете го“, нагласи Лавров.