Рускиот министер за надворешни работи Сергеј Лавров изјави дека мировниот договор со Киев мора да вклучува разоружување на украинската армија, како и укинување на санкциите против Русија.
Условите наведени од Лавров се во согласност со официјалните воени цели на рускиот претседател Владимир Путин, поради што Москва ја започна инвазијата во 2022 година.
„На дневен ред се целите за демилитаризација и денацификација на Украина, укинување на антируските санкции, повлекување на сите тужби против Русија и враќање на нејзиниот имот што беше нелегално запленет на Запад. Сите овие одредби треба да бидат наведени во правно обврзувачки мировен договор“, рече Лавров.
Според него, секој договор што не ги вклучува овие барања нема да биде долгорочно решение, туку „едноставна пауза во војната“.
„Не ни е потребна паузата што режимот во Киев и неговите надворешни манипулатори би сакале да ја направат за да ги прегрупираат трупите, да продолжат со мобилизацијата и да ги зајакнат воените капацитети“, додаде Лавров.
Лавров додава дека украинското раководство „го угнетува рускојазичното население во источна Украина“, што дополнително ја легитимира агресијата против Украина од руска перспектива.