Рускиот министер за надворешни работи Сергеј Лавров изјави дека ситуацијата околу украинско-руските разговори во Истанбул е „интригантна“, нагласувајќи дека никој не очекува лесен процес и повторно ја критикуваше улогата на Западот и властите во Киев во ескалацијата на конфликтот.
„Секако, сите сега зборуваат за Украина во врска со интригата што моментално се „кува“ во Истанбул“, рече Лавров на состанокот на Дипломатскиот клуб во Москва, објави РИА Новости.
Тој додаде дека разговорите ќе бидат тешки и потсети на застојот во преговорите од 2022 година, за што ја обвини Велика Британија.
Лавров остро реагираше на барањето на украинскиот претседател Володимир Зеленски лично да присуствува на разговорите, нарекувајќи го Зеленски „патетична личност“ и велејќи дека е „манипулиран“ од надворешни актери. Тој ги повтори претходните ставови дека Киев води политика што не ги претставува сите делови од Украина, особено оние со рускојазично население.
Пред разговорите во Истанбул, Лавров ги повика западните земји да ги „присилат“ украинските власти да го почитуваат сопствениот устав, меѓународното право и Повелбата на ОН.
Тој ги идентификуваше Британците како клучни актери кои, како што вели, го водат Зеленски низ „џунглата на светската политика“ и го спречуваат смирувањето на ситуацијата, пренесува Танјуг.
Разговорите меѓу руската и украинската делегација се закажани да се одржат во канцеларијата на турскиот претседател Реџеп Таип Ердоган во центарот на Истанбул, на истата локација како и во 2022 година. Руската делегација ја предводи помошникот на претседателот Владимир Медински, а е придружувана од заменик-министерот за надворешни работи Михаил Галузин, началникот на Генералштабот Игор Костјуков и заменик-министерот за одбрана Александар Фомин.
Рускиот претседател Владимир Путин предложи разговорите да продолжат без предуслови, а портпаролот на Кремљ, Дмитриј Песков, рече дека целта на Русија е да постигне долгорочно мирно решение и да ги заштити националните интереси. Според Песков, руската делегација веќе пристигнала во Истанбул и ги чека украинските претставници.