Македонија спаѓа во државите со низок ризик за појава на туберкулозата. Во последните седум – осум години бројот на новорегистрирани пациенти се движи од 130 до 160 на годишно ниво. Смртноста е од шест до 15 пациенти годишно, беше посочено на денешната прес-конференција.
Директорот на Институтот за белодробни заболувања и туберкулоза – Скопје, Димитар Каркински соопшти дека годинава на Институтот има само еден починат пациент од туберкулоза, но дека се собираат податоци од целата држава.
-Немојте да мислите дека заболените од туберкулоза се некои стари луѓе кои живеат во планински села. Напротив, туберкулоза се јавува и кај млади и кај градски лица, подвлече Каркински.
Според него, добро е што земјава спаѓа во држави со низок ризик за појава на оваа болест.
-Точно е дека имаме активни случаи на туберкулоза, имаме луѓе кои се лекуваат и за жал, уште ќе има луѓе и понатаму со туберкулоза. Добро е што Република Македонија е во земји со низок ризик за појава на туберкулоза – 10 на 100 илјади. Во таа група сме. Станува збор за заразно инфективно заболување. Тоа значи дека проблемот не е само за болниот кој ја има туберкулозата, туку има и друга социјална димензија, појасни Каркински.
Пулмологот Зорица Нановиќ се осврна на тоа дека болните се жалат на кашлица, понекогаш со примеси на крв, слабеење, загуба на апетитот и она што е карактеристично, потењето во ноќни часови.