Францускиот претседател Емануел Макрон изјави дека владата во заминување ќе остане на функција до средината на август додека Франција е домаќин на Олимпијадата, отфрлајќи го обидот на левичарскиот сојуз да наметне нов премиер.
Француската левичарска коалиција Нов народен фронт, која освои најмногу места во парламентот на изборите овој месец, но не и мнозинство, во вторникот објави дека ќе ја номинира експертката за финансиски криминал Луси Кастес за свој премиерски кандидат.
Но, на прашањето за Кастес, која е непозната за јавноста, Макрон изјави за France 2: „Името не е проблемот. Прашањето е: Какво мнозинство може да се добие во (Националното) собрание?
„До средината на август не сме во позиција да ги промениме работите, бидејќи тоа би создало хаос“, додаде Макрон.
Олимписките игри во Париз, кои се одржуваат од петок до 11 август, се голем логистички и безбедносен предизвик за Франција, со 35 спортски објекти и околу 10.500 спортисти.
Ниту една партија не освои мнозинство во Долниот дом на парламентот, кој наместо тоа е поделен на три блока.
Левичарската коалиција се обидува да предложи нов премиер кој ќе го наследи премиерот во заминување Габриел Атал, но ја отфрли можноста за договор со другите политички сили и нема гласови во парламентот за формирање мнозинска влада.
Според францускиот устав, останува на претседателот да го назначи премиерот, така што левата коалиција нема начин да го принуди Макрон.
Наместо тоа, претседателот ги повика политичките партии да работат на создавање на поширока коалиција.
Касетс е директор за финансии и набавки во Градското собрание на Париз.
Дипломирала на елитното француско училиште за државни службеници Ecole Nationale d’Administration во 2013 година, но нема искуство во партиската политика.
Владата во заминување делува како техничка, управувајќи со секојдневните работи без можност за донесување нови закони.