„Златниот пасош“ на Малта, кој им овозможува на луѓето да станат граѓани преку инвестирање во земјата, е во спротивност со европското право, пресуди највисокиот европски суд.
Европската комисија ја тужеше Малта во 2022 година поради оваа шема, според која странците можат да добијат малтешки пасош и со тоа да добијат право да живеат и работат во која било земја од Европската Унија, ако платат најмалку 600.000 евра, купат или изнајмат имот со одредена вредност и дадат најмалку 10.000 евра на добротворни организации.
Европскиот суд на правдата утврди дека таквото „стекнување државјанство претставува само комерцијална трансакција“.
Малтешката влада сè уште не ја коментираше одлуката на судот на ЕУ.
Поранешниот премиер Џозеф Мускат ја нарече „политичка“.
Тој рече дека верува оти државјанството ќе продолжи да функционира на овој начин со „некои предизвици“.
Државата ризикува големи казни ако не се придржува до пресудата.
„Стекнувањето државјанство на Унијата не може да биде резултат на комерцијални трансакции“, објави Европскиот суд на правдата.
Малта претходно неколку пати повтори дека правилно ги толкува договорите на ЕУ, објави Ројтерс.
Земјата ги ослободи руските и белоруските државјани од шемата во 2022 година откако Русија започна инвазија на Украина, а Европа воведе санкции врз луѓе поврзани со Кремљ.
Последната пресуда е во спротивност со извештајот од октомври минатата година, напишан од тогашниот претставник на Високиот суд, Ентони Колинс.
Тој рече дека комисијата не докажала дека европското право бара постоење на „вистинска врска“ помеѓу лицето и државата што доделува законско државјанство.
Секоја земја-членка треба да одлучи „кои ќе бидат нејзини граѓани, а со тоа и граѓанин на ЕУ“, додаде тој.
Иако секоја земја-членка на ЕУ самостојно одлучува како доделува државјанство, судот рече дека малтешката шема „ја поткопува меѓусебната доверба“ меѓу земјите.
ЕУ претходно ги повика земјите да ја прекинат практиката, додавајќи дека доделувањето државјанство на инвеститорите претставува безбедносни предизвици и ризици поврзани со перење пари, даночно затајување и корупција.