Германскиот канцелар Фридрих Мерц денес изјави дека целосното уништување на иранската програма за нуклеарно оружје може да биде на дневен ред доколку Техеран не попушти и не се врати на преговарачката маса.
„Израелската војска очигледно не е способна да постигне целосно уништување на иранската нуклеарна програма бидејќи нема оружје потребно за тоа. Но, Американците имаат такво оружје“, рече Мерц во интервју за телевизијата „ZDF“ на маргините на самитот на Групата седум (Г7) во Канада.
Порано денес, германскиот канцелар Мерц изјави дека политичкото раководство во Техеран е ослабено од израелските напади во последните денови и веројатно нема брзо да се опорави, но дека понудата за дипломатска помош од европските лидери останува валидна.
„Иранскиот режим е многу ослабен и веројатно нема да се врати на својата поранешна сила, што ја прави иднината на земјата неизвесна. „Ќе мора да почекаме и да видиме“, рече Мерц во интервју за германскиот весник Велт.