Уделот на сајбер напади насочени кон критична инфраструктура, а зад коистојат некои држави, се зголеми од 20 на 40 отсто од сите напади откриени од Microsoft, според извештајот на компанијата за сајбер криминал за периодот од јули 2021 година до јуни оваа година.
Тој скок делумно се должи на целта на Русија да ја оштети инфраструктурата на Украина и агресивното шпионско таргетирање на сојузниците на Украина, вклучително и САД. Русија, исто така, ги засили своите напори да ги компромитира ИТ компаниите со нарушување на нивните операции или со добивање разузнавачки информации од нивните клиенти, владини агенции во земјите-членки на НАТО, според Microsoft.
Дури 90 отсто од руските напади забележани од таа компанија во текот на изминатата година биле насочени кон земјите членки на НАТО, а 48 отсто кон ИТ компании лоцирани во земји членки на НАТО.
Заедно со Русија, од земјите кои користат сајбер напади се издвоени Иран, Северна Кореја и Кина.
Иранците, според извештајот, започнале напади насочени кон Израел односно ransomware и hack-and-leak против противници надвор од регионот, вклучувајќи ги САД и ЕУ. Microsoft, на пример, откри ransomware напад со цел да избрише израелски податоци, а во друг случај, ирански хакер извршил напад што ги активирало сирените за итни случаи во Израел.
Во извештајот се вели дека Северна Кореја стои зад серија напади насочени кон кражба на технологија од авиокомпании и истражувачки компании ширум светот, како и често неуспешни упади во компании за криптовалути.
Кина ги зголеми своите сајбер напади насочени кон шпионажа и кражба на информации бидејќи се обидува да изврши поголемо регионално влијание во Југоисточна Азија и да се спротивстави на зголемениот интерес од САД. Кина, исто така, ги искористи своите сајбер способности во кампањи насочени кон нациите низ јужната хемисфера, вклучително и Намибија, Маурициус и Тринидад и Тобаго, се вели во извештајот.
Microsoft, исто така, истакна дека Русија користела различни онлајн операции за да ја претстави својата инвазија на Украина како оправдана, како и да ги дискредитира западните вакцини против Ковид и да ја промовира ефикасноста на сопствените вакцини. Microsoft, исто така, забележа растечко преклопување помеѓу овие операции и сајбер нападите.