Хрватскиот претседател Зоран Милановиќ денеска изјави дека Хрватска не може да ја заврши војната во Украина, но може да се дистанцира од неа, додека светот чека да види како новиот американски претседател Доналд Трамп ќе придонесе за ставање крај на конфликтот, пренесе „Ал Џазира“.
„Да се одбие учество во воени мисии – о, да. Мисијата да ѝ се помогне на Украина, како што е замислена, никогаш нема да се реализира бидејќи ниту еден експерт не може да ми објасни дека логистиката и планирањето на испорака на воени материјали не се воени активности. Па, тоа се воени цели“, рече Милановиќ.
Тој додаде дека е сосема друга приказна кога се во прашање сојузниците на Хрватска во НАТО.
„Учествуваме во помагањето на нашите сојузници, како што се Полска и Литванија, кои сакаат војниците на НАТО да бидат таму, па ете и нашите луѓе се таму. Но, да придонесеме за завршување на војната, која е последица на криминалната неодговорност и неспособност на група политичари, не можеме и не сакаме да учествуваме во неа. Немам такви амбиции“, рече Милановиќ.