Висок палестински функционер запознаен со преговорите за прекин на огнот меѓу Израел и Хамас изјави за Би-Би-Си дека катарските и египетските посредници предложиле нова формула за ставање крај на војната во Газа.
Според официјални лица, планот предвидува примирје кое ќе трае меѓу пет и седум години, ослободување на сите израелски заложници во замена за палестинските затвореници од израелските затвори, формален крај на војната и целосно повлекување на Израел од Газа.
Делегација на Хамас на високо ниво треба да пристигне во Каиро на консултации.
Последниот прекин на огнот пропадна пред еден месец кога Израел продолжи да ја бомбардира Газа, при што двете страни ја обвинија другата за неуспехот да се одржи примирјето.
Израел се уште не го коментирал планот
Хамас во разговорите во Каиро ќе биде претставен од шефот на неговиот политички совет Мохамед Дарвиш и главниот преговарач Калил ал Хаја.
Ова доаѓа само неколку дена откако Хамас го отфрли последниот предлог на Израел кој вклучуваше барање Хамас да се разоружа во замена за шестнеделно примирје.
Во саботата, израелскиот премиер Бенјамин Нетанјаху рече дека нема да ја прекине војната додека Хамас не биде уништен и сите заложници не бидат ослободени. Хамас, од друга страна, бара Израел да се обврзе да стави крај на војната пред да ги ослободи заложниците.
Палестински функционер запознаен со разговорите изјави за Би-Би-Си дека Хамас ја сигнализирал својата подготвеност да ја предаде администрацијата на Газа на кој било палестински ентитет за кој е договорен „на национално и регионално ниво“. Официјалниот претставник рече дека тоа би можело да биде Палестинската управа со седиште на Западниот Брег или новоформираното административно тело.
Нетанјаху отфрли каква било улога на палестинската управа во идното управување со Газа, со која владее Хамас од 2007 година.
Иако сè уште е рано да се процени веројатноста за успех, изворот ги опишува сегашните напори за посредување како сериозни и вели дека Хамас покажал „флексибилност без преседан“.
На 7 октомври 2023 година, Хамас го нападна Израел, убивајќи околу 1.200 луѓе главно цивили и одведоа 251 лице во Газа како заложници. Израел одговори со голема воена офанзива во која, според Министерството за здравство на Хамас во Газа, загинаа 51.240 Палестинци главно цивили.
Во меѓувреме, палестинската амбасада во Каиро им нареди на својот персонал кој ја координираше медицинската евакуација од Газа во египетските болници и го олеснуваше влезот на хуманитарна помош да се преместат со своите семејства во египетскиот град Ариш, во близина на границата со Газа.