Најмалку 200 жртви на насилството во Централна Нигерија

Жртвите на нападите на вооружените групи во централната нигериска држава Плато сега достигнаа 198, покажуваат новите податоци на локалните власти.

Во селото Бокос се пронајдени 148 жртви, а 50 луѓе се убиени во четири села во соседната област Баркин Лади. 500 беа повредени, а илјадници луѓе ги напуштија своите домови.

Помеѓу саботата навечер и понеделникот наутро, вооружени групи нападнаа најмалку 20 села во државата Плато, која со години е измачувана од верски и етнички тензии. Локалните власти велат дека нападите биле добро координирани.

Претседателот на Нигерија, Бола Тинубу, им нареди на безбедносните агенции веднаш да интервенираат и да ја проверат секоја педа од областа погодена од насилство за да ги фатат одговорните.