Израелскиот премиер Бенјамин Нетанјаху го разгледува планот за намалување на хуманитарната помош за северна Газа во обид да ги изгладне милитантите на Хамас, што, доколку се спроведе, може да зароби стотици илјади Палестинци кои не сакаат или не можат да ги напуштат своите домови, пишува „Асошиетед прес“ (АП).
Планот предложен до Нетанјаху и израелскиот парламент од група пензионирани генерали ќе го зголеми притисокот со тоа што ќе им даде на Палестинците една недела да ја напуштат северната третина од Појасот Газа, вклучувајќи го и градот Газа, пред областа да биде прогласена за затворена воена зона.
Оние што ќе останат ќе се сметаат за борци, што според воените регулативи ќе им овозможи на израелските трупи непречено да ги нападнат и ќе им се оневозможи храна, вода, лекови и гориво. Израел вели дека ова е единствениот начин да се скрши Хамас на север и да се принуди да ги ослободи преостанатите заложници.
Планот предвидува Израел да ја задржи контролата врз северниот дел на неодредено време, со цел да се обиде да создаде нова администрација без Хамас, која би го поделила Појасот Газа на два дела.
Не е донесена конечна одлука за имплементација на таканаречениот Генерален план и не е јасно колку сериозно се разгледува планот.
Сепак, официјален претставник запознаен со ова прашање изјави за АП дека делови од планот веќе се спроведуваат, без да даде детали. Друг официјален претставник, кој е од Израел, рече дека Нетанјаху го „прочитал и проучувал“ планот, „како и многу други планови што му биле доставени за време на војната“, но не кажа дали некој од нив бил усвоен. Официјалните лица зборуваа под услов да останат анонимни бидејќи планот не е закажан за јавна расправа.