Израелскиот премиер Бенјамин Нетанјаху ги осуди денес налозите на Меѓународниот кривичен суд (МКС) за негово и апсење на неговиот поранешен министер за одбрана Јоав Галант како антисемитски.
„Израел со гадење ги отфрла апсурдните и лажни акции на МКС“, соопшти неговиот кабинет и додаде дека Нетанјаху „нема да попушти под притисокот во одбраната на израелските граѓани“.
Израелските политичари му изразија поддршка на израелскиот премиер.
Претседателот на Израел Исак Херцог кажа дека таа одлука „ја одбрала страната на тероризмот и злото пред демократијата и слободата и го претворила меѓународниот правен систем во жив ѕид за злосторствата против човештвото на Хамас“.
Израелскиот министер за надворешни работи Гидеон Стар кажа дека ова е „мрачен момент за МКС“ и дека судот го „изгубил целиот легитимитет“.
На осудите се придружи и израелскиот опозициски лидер Јаир Лапид. „Израел го брани својот живот од терористичките организации кои нападнаа, убиваа и силуваа наши граѓани, овие налози за апсење се награда за тероризмот“, кажа Лапид.
Хамас ја поздрави одлуката. „Го повикуваме Меѓународниот кривичен суд да го прошири опсегот на одговорноста за сите лидери на криминалната окупација“, се наведува во соопштението.
„Ова е важен чекор на патот кон правдата и обезбедувањето правда за жртвите, но останува ограничен чекор ако не го поддржат практично сите земји“, кажа Баем Наим, висок функционер на Хамас.
МКС објави дека постојат основани докази дека Нетанјаху и Галант се кривично одговорни за изгладнување на населението во Појасот Газа и прогон на Палестинците.
Израел ја отфрли надлежноста на судот со седиште во Хаг и негира воени злосторства во Газа.