Израелскиот премиер Бенјамин Нетанјаху ги нападна британскиот премиер Сер Кир Стармер и лидерите на Франција и Канада, велејќи дека тие „де факто рекле дека сакаат Хамас да остане на власт“.
Во соопштение објавено во видео формат на социјалната мрежа X, Нетанјаху остро ги критикуваше, заедно со Стармер, францускиот претседател Емануел Макрон и канадскиот премиер Марк Карни, тврдејќи дека тие сакаат Израел да се откаже и да го прифати опстанокот на армија од масовни убијци, пренесува Би-Би-Си.
Тој, исто така, ги обвини Стармер, Емануел Макрон и Марк Карни дека се на страната на „масовни убијци, силувачи, убијци на бебиња и киднапери“.
Зборувајќи за нападот врз персоналот на израелската амбасада во Вашингтон, Нетанјаху рече дека лидерите на некои од најблиските сојузници на Израел сакаат Израел да „се откаже и да прифати дека армијата на масовни убијци на Хамас ќе преживее“.
„Секој на кого терористите му се заблагодаруваат е очигледно на погрешната страна на правдата, човештвото и историјата“, им рече Нетанјаху директно на Стармер, Макрон и Карни.
Иако британската влада не ги коментираше директно зборовите на Нетанјаху, Даунинг стрит потсети на претходното соопштение на премиерот Стармер за „Х“, во кое антисемитизмот беше означен како зло кое мора да се искорени.
Велика Британија, Франција и Канада претходно оваа недела го осудија проширувањето на израелската воена операција во Газа и одбивањето на хуманитарната помош. Тие предупредија дека во случај на продолжување на таквата политика, би можеле да преземат конкретни мерки.
Во својот говор, Нетанјаху уште еднаш нагласи дека Хамас не ја крие својата намера да го уништи Израел.
Израелскиот министер Амихај Чикли, исто така, ги нападна Стармер и другите лидери, обвинувајќи ги за зајакнување на терористичките сили. Од друга страна, Стармер претходно изјави дека е ужаснат од она што се случува во Газа и оцени дека моменталната ситуација е неподнослива. Тој особено ја критикуваше одлуката на израелската влада да дозволи само ограничена количина хуманитарна помош во Појасот Газа, што ја оцени како целосно несоодветна.
Израел ја започна својата воена операција во Газа откако Хамас изврши смртоносен напад на 7 октомври 2023 година, во кој беа убиени околу 1.200 луѓе, а 251 лице беше киднапирано.
Оттогаш, според Министерството за здравство управувано од Хамас, загинале најмалку 53.762 лица, вклучувајќи повеќе од 16.500 деца.