Јапонската организација „Нихон Хиданкјо,“ која ги обединува преживеаните од атомските бомбардирања на Хирошима и Нагасаки, е добитник на Нобеловата награда за мир оваа година, за нејзината долга борба против нуклеарното оружје.
Според претседателот на Норвешкиот комитет за Нобелова награда, Јорген Ватне Фриднес, наградата им одава почит на сите кои, и покрај физичкото страдање, избраа да го искористат своето искуство за промовирање на мир. Наградата за мир, единствената која ја доделува норвешкиот комитет во Осло, е потсетник за светските конфликти, особено на Блискиот Исток, Украина и Судан.
Нобеловата награда за литература ја доби јужнокорејската писателка Хан Канг, позната по својата поетична проза која ги обработува темите на историските трауми и кревкоста на човечкиот живот. Шведската кралска академија ја награди Канг за нејзината способност да ги разоткрие длабоките човечки искуства и да истражува широк спектар жанрови.
Канг е првата јужнокорејска лауреатка за литература и е позната и по Букеровата награда во 2016 година за романот „Вегетаријанец“.