Судењето на поранешниот заменик-министер за одбрана Тимур Иванов, кој се соочува со обвиненија за корупција и проневера на 3,2 милијарди рубљи (околу 35 милиони евра), започна во понеделникот зад затворени врати.
Според Ројтерс, ова е прво од серијата судења кои ги сигнализираат напорите на рускиот претседател Владимир Путин да ги исчисти руските вооружени сили од корупција.
Иванов ја извршуваше функцијата заменик министер за одбрана од 2016 година. Бил одговорен за изградба и реновирање на недвижен имот, управување со имотот, сместување на војниците, како и за медицинско обезбедување на вооружените сили.
Тој беше одговорен и за изградбата на главниот храм на руските вооружени сили, развојот на космодромот Восточни, како и за проектот за таканаречената обнова на окупираниот украински Мариупол, потсетува Ројтерс.
Соработниците на сега починатиот руски опозициски лидер Алексеј Навални во 2022 година тврдеа дека Иванов поседува недвижен имот во Москва, вклучително и резиденција од 19 век, како и во други руски градови, со вкупна вредност од околу една милијарда долари.
Тие, исто така, предупредија дека Иванов и неговото семејство водат луксузен живот, кој вклучува крстарења со јахти, летови со хеликоптери, скапи одмори на француската ривиера и купување на дијаманти, вклучително и инвестициски скапоцени камења кои во никој случај не соодветствуваат со неговите официјални приходи.
Според Ројтерс, тој важеше за еден од најбогатите луѓе во руските безбедносни структури, а од почетокот на руската инвазија на Украина, тој е под санкции од САД и Европската унија.
Иванов успешно остана на функцијата до април 2024 година, кога беше уапсен под сомнение за примање поткуп. Еден месец подоцна, Путин го разреши својот „шеф“, тогашниот министер за одбрана Сергеј Шојгу, со кого Иванов соработуваше додека Шојгу беше на чело на градската управа во Москва.
Но, додека поранешниот министер за одбрана избегна посериозни последици и само беше „префрлен“ на функцијата секретар на Советот за безбедност, Иванов беше обвинет за „особено голема“ корупција и проневера на 3,2 милијарди рубљи (приближно 35 милиони евра), за што му се заканува затворска казна од најмалку 15 години.
Апсењето на Иванов го предизвика најголемиот бран корупциски скандали што ги погодија руската војска и Министерството за одбрана во последните години. Оттогаш, според Ројтерс, властите уапсиле најмалку десетина други лица, вклучително и заменик началникот на кабинетот. Но, Иванов беше првиот показател за наводната решеност на Путин да ја искорени корупцијата во руските вооружени сили.
Според Ројтерс, шефот на Кремљ се обидува да спречи трошење, лошо управување и извлекување пари од војската, особено поради војната во Украина. Вооружените сили и безбедносните структури во моментов трошат дури 40 отсто од рускиот буџет.