Околу 600 севернокорејски војници се убиени во војната во Украина, соопшти разузнавачката агенција на Јужна Кореја. Пратеникот Ли Сун-квон, повикувајќи се на податоците на агенцијата, изјави дека околу 15.000 Севернокорејци се борат на страната на Русија во конфликтот, објави Ројтерс.
Ли Сун-квон изјави дека вкупниот број на повредени и мртви војници во Демократска Народна Република Кореја (ДНРК) е 4.700, вклучувајќи околу 600 мртви.
Според него, телата на мртвите биле кремирани во Курск, а потоа нивните останки биле префрлени во Северна Кореја.
Пратеникот додаде и дека од почетокот на годината, околу 2.000 војници се вратени во Северна Кореја, кои, според Ли, веројатно се во изолација во Пјонгјанг.
Војниците на ДНРК, според Ли, покажуваат подобрување на нивните борбени способности.
Северна Кореја потпиша сеопфатен договор за стратешко партнерство со Русија во 2024 година, кој предвидуваше меѓусебна помош во случај на вооружен напад.
Според извештаите од јужнокорејското разузнавање, Северна Кореја испратила 3.000 војници во Русија есента 2024 година, кои биле распоредени во Курската област.
Во зимата, украинските сили заробиле двајца севернокорејски војници кои се бореле во регионот, а еден од нив изразил желба да остане во Украина.
Во јануари, украинскиот претседател Володимир Зеленски потврди дека еден од заробените севернокорејски војници изразил желба да остане во Украина, додека членовите на 95-та посебна воздушно-десантна бригада дадоа детали за неговото заробување, пренесува „Танјуг“.