Набљудувачите на Обединетите нации забележаа нагло зголемување на цивилните жртви во Украина минатиот месец поради засилените напади на руските сили, соопшти денеска Канцеларијата на ОН за човекови права. Меѓу жртвите, најмалку 57 деца беа убиени или повредени во март, што е двојно повеќе од февруари.
Набљудувачката мисија на Обединетите нации за човекови права потврди најмалку 604 цивили убиени или повредени во Украина во март, што е за 20 отсто повеќе од февруари.
„Зголемувањето на цивилните жртви во март е главно резултат на нападите на руските вооружени сили кои користат ракети и експлозивни дронови низ Украина и зголеменото воздушно бомбардирање во близина на линијата на фронтот“, соопшти Канцеларијата за човекови права.
Мисијата откри дека најголемиот дел од цивилните жртви – 93,5 отсто – како и поголемиот дел од штетите на образовните и здравствените установи и критичната инфраструктура се случиле во областите контролирани од владата.
Украина претрпе особено тешки напади минатиот месец, при што претседателот Володимир Зеленски рече дека земјата може да остане без ракети за противвоздушна одбрана доколку Русија продолжи со својата интензивна кампања за бомбардирање со долг дострел. Минатата недела, тој рече дека само во март Русија истрела над 3.000 наведувачки бомби, 600 беспилотни летала и 400 проектили кон Украина.