За обновувањето и реконструкција на Појасот Газа, ќе бидат потребни повеќе од 53 милијарди долари, вклучително и 20 милијарди долари во првите три години, проценуваат денеска ОН.
„Потребите за краткорочно, среднорочно и долгорочно закрепнување и реконструкција во Појасот Газа се проценуваат на 53,142 милијарди долари. Од нив, краткорочните финансиски барања за првите три години се проценуваат на приближно 20,568 милијарди долари“, напиша генералниот секретар на ОН, Антонио Гутереш во извештајот до Генералното собрание на ОН.
Во резолуцијата усвоена во декември со која се повикува на итен и безусловен прекин на огнот во Појасот Газа, Генералното собрание на ОН побара од Гутереш да му даде проценка на краткорочните, среднорочните и долгорочните потреби на Газа во рок од два месеци.
„Иако во сегашниот контекст не беше можно целосно да се процени целиот опсег на потреби што ќе бидат потребни во Појасот Газа, брзата привремена проценка дава првична индикација за значителниот обем на потребите за обновување и реконструкција на територијата“, се вели во извештајот.
Со уништени „повеќе од 60 проценти од домовите“ од октомври 2023 година, на секторот за домување ќе му требаат околу 30 проценти од потребите за реконструкција, или 15,2 милијарди долари, се вели во извештајот.
Потоа следат трговијата и индустријата (6,9 милијарди), здравството (6,9 милијарди), земјоделството (4,2 милијарди), социјалната заштита (4,2 милијарди), транспортот (2,9 милијарди), водата и канализацијата (2,7 милијарди) и образованието (2,6 милијарди).
Во извештајот се наведуваат и особено високите трошоци што се очекуваат за секторите за животна средина (1,9 милијарди долари), „поради големата количина отпад што содржи неексплодирани убојни средства и високите трошоци поврзани со отстранувањето на отпадот“.
ОН проценуваат дека конфликтот создал „повеќе од 50 милиони тони отпад, под кој лежат човечки остатоци заедно со неексплодирани убојни средства, азбест и други опасни материјали“.