Унгарскиот премиер Виктор Орбан ќе се сретне во Москва со рускиот претседател Владимир Путин, објави Ројтерс, повикувајќи се на Радио Слободна Европа и Фајненшл тајмс.
Руските новински агенции го цитираа портпаролот на Кремљ, Дмитриј Песков, кој ниту ја потврдува ниту негира можната посета. РИА Новости го цитира Песков дека Путин „има напорен распоред“ во петок, за што Кремљ подоцна ќе ги информира медиумите.
Ова ќе биде прва средба меѓу Путин и Орбан во Русија од почетокот на кризата во Украина. Орбан, кој во споредба со другите европски лидери одржува блиски односи со Москва, ја посети Русија во 2022 година, но тогаш не се сретна со нејзиниот претседател. После тоа се сретнаа, но во други земји.
На почетокот на месецот Унгарија го презеде ротирачкото претседавање со ЕУ, главно церемонијална улога поврзана со поставувањето на агендата и донесувањето договор кога ќе се усвои законодавството, забележува Ројтерс.
Унгарската влада не одговори на прашања испратени по е-пошта за коментар.
Претходно оваа недела, Орбан го посети Киев, каде што го повика украинскиот претседател Володимир Зеленски да размисли за примирје за да се забрза крајот на војната со Русија.
„Ротационото претседателство со Европската унија нема овластување да контактира со Русија во име на ЕУ“, рече претседателот на Европскиот совет, Шарл Мишел на својот профил на социјалната мрежа X, реагирајќи на извештаите за посетата на Орбан на Москва „Без самата Украина не може да се водат дискусии за Украина“, додаде тој.
Унгарија, членка на ЕУ и НАТО, одби да испрати оружје во Украина и ги критикуваше санкциите на Европската унија против Русија.