„Драматичните скокови на цената на нафтата по руската инвазија на Украина ставија во втор план уште поголем проблем – зголемувањето на цените на храната“, предупреди Лари Финк, основачот на најголемиот светски инвестициски фонд „Блекрок“.
„Една работа за која се грижам и за која не зборуваме доволно е храната“, изјави тој за Фајненшл Тајмс. „Ова не е само загриженост за инфлацијата. Од ова произлегуваат и геополитички грижи“, додаде тој за Фајненшл тајмс.
Цените на енергијата и бензинот пораснаа претходно оваа година кога западните земји воведоа санкции кон Русија по инвазијата. Цената на житото и маслото за јадење исто така нагло се зголемија бидејќи Украина е главен извозник.
„Многу зборуваме за цените на бензинот бидејќи тоа ги погодува Американците, но поголемото прашање е храната“, рече Финк. „Во Украина се случи огромно уништување на обработливо земјиште. На глобално ниво, цената на ѓубривата е зголемена за речиси 100 проценти и овој дополнителен трошок ја намалува количината на ѓубриво што се користи во земјоделството. Ова му штети на квалитетот на посевите ширум светот“, додаде тој.
Светската банка прогнозира дека глобалните цени на храната ќе пораснат за 20 отсто оваа година, што е далеку над цените на суровините.
Влијанието е особено сериозно во Африка, која обично увезува жито од Украина. Таму цените на ѓубривата поскапеа за 300 проценти.
Бил Гејтс изрази слична загриженост оваа недела, велејќи дека трошењето на пченица, масла за готвење и други резерви на храна предизвикани од војната во Украина „ги зголемува цените на храната, што ќе ја зголеми неухранетоста и нестабилноста во земјите со ниски приходи“, пишува Индекс.