Данскиот производител на накит „Пандора“ денеска објави дека неговите дополнителни трошоци поради царините на Трамп ќе изнесуваат приближно 1,2 милијарди дански круни или повеќе од 160 милиони евра годишно.
Акциите на Пандора денеска паднаа за 12 отсто, на најниско ниво во последните 15 месеци, откако американскиот претседател Доналд Трамп воведе реципрочни царини за увоз од повеќе од 180 земји и територии.
Администрацијата на Трамп воведува царина од 37 отсто на Тајланд, каде „Пандора“ има две фабрики кои произведуваат најголем дел од нараквици и друг накит.
Американскиот пазар е клучен за „Пандора“. Минатата година остварила 31 отсто од вкупниот приход во САД, пренесува „Танјуг“.
Пандора објави дека размислува да ги зголеми цените и да го промени синџирот на снабдување за да го ублажи влијанието на американските царини, првенствено за стоки дистрибуирани преку САД и продадени во Канада и Латинска Америка, објави „Ројтерс“.
Пандора внимателно ќе ги следи случувањата, вклучително и дискусиите меѓу САД и земјите погодени од царините, објави данската компанија.