Откако ја разбесни Кина поради нејзината посета на Тајван, претседателката на Претставничкиот дом на САД, Ненси Пелоси, дојде во Сеул, Јужна Кореја, но избегна директни јавни коментари за односите со Пекинг и Тајпеј што може дополнително да ги зголеми регионалните тензии.
Пелоси, првиот претседател на Претставничкиот дом на САД кој го посети Тајван по 25 години, вчера во Тајпеј изјави дека посветеноста на Америка за демократија на автономниот остров и на други места „останува силна“.
Како одговор на нејзината посета, Кина денеска започна воени вежби, вклучително и вежби за ракетни напади, во шест зони околу Тајван. Се верува дека ова би можеле да бидат најголемите воени вежби од овој тип од средината на 1990-тите.
По посетата на Тајван, Пелоси и нејзината конгресна делегација синоќа отпатуваа во Јужна Кореја, клучниот американски сојузник каде се распоредени околу 28.500 американски војници. Пелоси е на азиска турнеја за време на која ги посети Сингапур и Малезија пред Јужна Кореја и Тајван.
Таа денеска се сретна со претседателот на јужнокорејскиот парламент Ким Џин-Пјо и други високи членови на парламентот. По средбата, таа зборуваше за билатералната алијанса изградена во крв за време на Корејската војна 1950-1953 година и парламентарните напори за зајакнување на врските, но директно не ја спомена посетата на Тајван, ниту кинеските протести.
Ниту Ким ниту Пелоси не одговараа на прашањата на новинарите.
Ким рече дека тој и Пелоси споделуваат загриженост за растечката нуклеарна закана на Северна Кореја. Тој рече дека се согласиле да го поддржат притисокот на нивните влади за денуклеаризација и мир на Корејскиот полуостров заснован на силно севернокорејско одвраќање и дипломатија.
Пелоси и нејзината делегација подоцна телефонски разговараа со јужнокорејскиот претседател Јун Сук-Јол за алијансата, надворешната политика и други теми. Јун е на одмор оваа недела, но критичарите го обвинуваат дека намерно избегнува директна средба со Пелоси за да внимава на врските со Кина, најголемиот трговски партнер на Јужна Кореја.
За време на телефонскиот разговор, ниту Пелоси, ниту Јун не го покренаа прашањето за Тајван.