Откако инвестираше околу 26 милијарди долари во електрификација, Стелантис размислува за подлабока соработка со кинескиот производител на електрични возила Липмотор за да ги намали трошоците за развој и да го забрза лансирањето на нови модели.
Уште во 2023 година, Стелантис купи 20% од акциите на Липмотор за 1,1 милијарда долари, а со договорот доби ексклузивни права за дистрибуција за кинескиот бренд на западните пазари.
Соработката сега би можела да оди чекор понатаму – Стелантис ја разгледува можноста за користење на технологијата за батерии и електричен погон на Липмотор за некои од своите брендови, како што се Фиат, Опел и Пежо.
Според извори од индустријата, разговорите се сè уште во рана фаза, но користењето на кинеската технологија би можело да заштеди милијарди долари во развој и овозможи побрзо одговор на конкуренцијата од Кина, како што се BYD и MG Motor, како и традиционалните европски производители како што се Фолксваген Групацијата и Рено.
Сепак, користењето на кинеска технологија може да биде комплицирано, особено поради правилата на американскиот пазар.
Возилата со поврзани системи кои имаат врски со Кина ќе бидат забранети за увоз и продажба во САД од 2027 година.
Извршниот директор на Стелантис, Антонио Филоза, вели дека техничката соработка со Липмотор би можела значително да ја зголеми конкурентноста на компанијата, особено во сегментот на електрични автомобили во Европа.
Тој додаде дека 2025 година била клучна за поставување на темелите за подлабока интеграција меѓу двете компании.
Порано овој месец, Стелантис, исто така, објави отпис на трошоци од 22,2 милијарди евра, или околу 26,1 милијарди долари, по прилагодувањето на својата стратегија за електрификација. Иако компанијата ги забавува своите инвестиции, јасно е дека не може целосно да се откаже од електричните возила.
Преку заедничкото претпријатие Липмотор Интернашнл, Стелантис веќе помогна во лансирањето модели како што се Липмотор C10 и Липмотор B10 на европските и австралиските пазари.
Малиот модел Липмотор T03 исто така кратко време се произведуваше во Полска, но производството беше прекинато минатата година поради промени во политиката за меѓународна трговија.
Компанијата сега планира да започне со производство на електрични автомобили Липмотор во својата фабрика во Сарагоса, Шпанија, подоцна годинава.