Повеќе од 1,5 милиони хрватски граѓани се неактивни и се држат настрана од пазарот на трудот. Додека работодавачите мака мачат да најдат работници, поради што мораат да ги увезат, на домашниот пазар има цела армија на неактивно работоспособно население, односно оние кои ниту работат ниту бараат работа. Ги има речиси исто толку колку што има вработени (1,517 милиони неактивни наспроти 1,684 милиони вработени).
И додека уделот на вработени лица порасна во текот на изминатите 10 години (од 43 отсто во 2014 година на 51 отсто минатата година), уделот на неактивни лица во истиот период малку падна (од 47 на 46 отсто), според податоците од Истражувањето на работната сила на Националното биро за статистика.
Експертите објаснуваат дека се работи за комплексен проблем бидејќи неактивните се исклучително хетерогена група и нивното активирање бара преземање низа различни и систематски мерки. Ги има малку, често се лошо „скроени“ и неконзистентни. Затоа, на крајот на краиштата, не сме сведоци на сериозен пад на бројот на оние кои би можеле да работат, а не бараат работа.
– Тоа секако не е добро бидејќи „активирањето на потенцијалот на неактивните граѓани не само што ќе ги подобри економските показатели, туку и ќе придонесе за поголема социјална кохезија и квалитетен живот во Хрватска, нагласува Предраг Бејаковиќ, независен економски аналитичар, објави Пословни дневник.
Тој објаснува дека високата стапка на неактивност во Хрватска е резултат на комбинација на демографски промени, неусогласеност меѓу образованието и пазарот на труд и недоволно приспособени социјални и економски политики.
„Решението на проблемот лежи во стратешките реформи кои ќе ги опфатат сите возрасни групи и општествени класи, почнувајќи од младите, жените, до старите лица и лицата со попреченост“, посочува тој.
Дополнително загрижува тоа што мнозинството неактивни луѓе не бараат работа и не сакаат да работат, предупредуваат експертите.
„Најчеста причина за ваквиот став е тоа што се пензионери или се луѓе кои не бараат работа поради здравствени проблеми“, објаснуваат тие.