Полскиот премиер Матеуш Моравјецки ја обвини Европската комисија и делови од Европскиот парламент дека неправедно ја издвоиле неговата земја за прашања поврзани со владеењето на правото, јави ДПА.
– Не смееме да молчиме кога нашата земја е нападната, рече Моравјецки пред европратениците и претседателката на Еврокомисијата Урсула фон дер Лејен. – Го отфрлам јазикот на заканите и нема да дозволам политичари од ЕУ да ја уценуваат Полска, рече тој.
Моравјецки цитираше правни одлуки од Франција, Германија и Данска за кои тврде дека ја релативизирале превласта над законодавството на ЕУ на сличен начин како и неодамнешната пресуда на Уставниот полски суд.
ЕУ може да престане да биде федерација на слободни држави и да стане централно управувана група провинции доколку моќта на институциите на ЕУ не се контролира, предупреди тој. – Ова не е она на што се согласивме во договорите, рече Моравјецки.
Претходно, претседателката на Европската комисија Урсула фон дер Лејен изјави дека Брисел „нема да дозволи” Полска да ги доведе во ризик вредностите на ЕУ. Во обраќањето пред пратениците во Стразбур, Фон дер Лејен рече дека неодамнешната пресуда на Уставниот суд на Полска претставува закана за основните принципи на блокот.
Европската унија е во конфликт со Полска поради одлуката на Варшава да воведе промени во судскиот систем на земјата, што и даваат на владата поголема моќ над судовите. Унијата го смета овој потег за недемократски, додека владејачката Партија на правото и правдата вели дека промената била неопходна за реформира на неефикасниот систем. Уставниот суд на Полска неодамна пресуди дека националното законодавство е над она на ЕУ.