Мајк Џефрис, поранешниот долгогодишен извршен директор на модната компанија Abercrombie & Fitch, е уапсен и обвинет за сексуална трговија и проституција во која се вклучени десетици мажи.
Обвинението од 16 страници беше објавено во вторникот од федералните обвинители во Бруклин, десет години откако Џефрис ja напушти трговијата на мало што ја изгради повеќе од 22 години во популарна марка облека позната по својт сексуален маркетинг.
Властите ги уапсија Џефрис (80), неговиот партнер Метју Смит (61) и наводниот посредник на парот, Џејмс Џејкобсон (71), во вторникот наутро.
Федералните обвинители соопштија дека мажите користеле сила, измама и принуда за да се вклучат во „насилни и експлоататорски“ сексуални дејствија. Тие се обвинети дека намамиле млади мажи со изгледи за манекенство за сексуално да ги злоупотребуваат.
„Ова е предупредување за сите кои користат кастинг на кауч“
Американскиот обвинител Бреон Пис, чија канцеларија обезбеди пресуда и 30-годишна затворска казна за пејачката Р. Кели поради обвиненијата за сексуална експлоатација, рече дека моќните луѓе предолго сексуално злоставувале млади луѓе кои копнееле за кариера во модната и забавната индустрија.
-За секој кој мисли дека може да ги искористува и принудува другите користејќи го таканаречениот систем „кастинг на каучот“ (барање сексуални услуги од кандидатите за работа во замена за вработување), овој случај треба да служи како предупредување: Подгответе се да го замените тој кауч за кревет во федерален затвор – рече Пис на прес-конференцијата.
Тие се соочуваат со долги затворски казни, можеби и доживотни
Доколку бидат прогласени за виновни, тие се соочуваат со можна доживотна затворска казна и задолжителна минимум 15 години затвор за обвиненијата за трговија со луѓе. Ним им се заканува затворска казна до 20 години под обвинение за меѓудржавна проституција.
Аберкромби одби да коментира за случајот. Компанијата не е обвинета за неправилност, а Пис рече дека нема докази дека наводните злосторства се случиле во нејзиниот имот.