Иранските јавни личности, вклучувајќи ги добитниците на Нобеловата награда за мир Наргес Мохамади и Ширин Ебади, како и филмските режисери, добитници на награда во Кан, Џафар Панахи и Мохамад Расулоф, повикаа на „крај на воените непријателства“ меѓу Израел и Иран и Исламската Република да го запре збогатувањето на ураниум.
„Континуираното збогатување на ураниум и разорната војна меѓу Исламската Република и израелскиот режим не им служат ниту на интересите на иранскиот народ, ниту на интересите на човештвото. Овој конфликт не само што ја уништува инфраструктурата и животите на цивилите, туку претставува и сериозна закана за самите темели на човечката цивилизација“, напишаа тие заедно со уште тројца членови на иранското граѓанско општество во статија објавена од францускиот весник „Ле Монд“.
„Ние, активистите на иранското граѓанско општество и потписниците на оваа изјава, бараме Исламската Република веднаш да престане со збогатување на ураниум, бараме крај на воените непријателства, крај на нападите врз виталната инфраструктура и во Иран и во Израел и крај на масакрот врз цивилите во двете земји“, додадоа тие.
Познати Иранци повикуваат на промена на режимот
„Збогатувањето на ураниумот во никој случај не е прашање на иранскиот народ. Не смее да се жртвува во име на нуклеарните и геополитичките амбиции на авторитарниот режим. Единствениот кредибилен начин да се зачува оваа земја и нејзиниот народ е оставка на сегашните лидери и започнување на мирен процес на транзиција кон вистинска демократија“, веруваат тие.
Групата потписници ги вклучува добитничките на Нобеловата награда за мир Наргес Мохамади (2023) и Ширин Ебади (2003), потоа лауреатите на Канскиот филмски фестивал Џафар Панахи (Златна палма 2015) и Мохамад Расулоф (Специјална награда од жирито 2024); теологот, адвокат и активист за права на жените Седиге Васмаги; активистката за човекови права Шахназ Акмали; и адвокатот за човекови права Абдулфатах Солтани.
Од петок, во тек се големи израелски бомбардирања насочени кон воени бази, нуклеарни централи и населени области во Иран.
Во тие бомбардирања загинаа најмалку 224 лица, вклучувајќи високи воени функционери, нуклеарни научници и цивили, а повеќе од 1.000 лица беа повредени во Иран, според официјален извештај од иранското Министерство за здравство. Техеран одговори со рафали од ракети и беспилотни летала во кои загинаа најмалку 24 лица во Израел, според канцеларијата на израелскиот премиер, вклучувајќи 11 во понеделник.